ڈپٹی کمشنر لاہورکامریم نواز سکول فار اسپیشل چلڈرن کادورہ

لاہور(سٹی رپورٹر) ضلعی انتظامیہ لاہور کی جانب سے بلدیاتی امور، انسدادِ ڈینگی اور خصوصی بچوں کی فلاح و بہبود کے اقدامات کا جائزہ لینے کے لیے ڈپٹی کمشنر لاہور کیپٹن (ر) محمد علی اعجاز نے تحصیل شالیمار کا تفصیلی دورہ کیا۔ اس موقع پر چیف آفیسر ایم سی ایل کلیم یوسف اور اسسٹنٹ کمشنر شالیمار رابیہ الطاف بھی ان کے ہمراہ تھے۔ دورے کے دوران ایل ڈبلیو ایم سی حکام نے ڈپٹی کمشنر کو "چمکتا لاہور” مہم کے تحت جاری صفائی کی کارروائیوں اور کچرا منتقلی کے عمل پر تفصیلی بریفنگ دی۔

صفائی کے انتظامات کا جائزہ لیتے ہوئے ڈپٹی کمشنر لاہور کیپٹن (ر) محمد علی اعجاز نے تمام شاہراہوں، گلی محلوں اور تجارتی مراکز میں زیرو ویسٹ کے اہداف یقینی بنانے کی سخت ہدایت کی۔ انہوں نے واضح کیا کہ کوڑا کرکٹ کی بروقت منتقلی اور صفائی کے عمل میں کسی قسم کی غفلت برداشت نہیں کی جائے گی۔ انہوں نے مزید کہا کہ چمکتا لاہور مہم کے تحت روزانہ کی بنیاد پر صفائی کی جا رہی ہے

تاکہ شہریوں کو تعفن سے پاک ماحول میسر آ سکے، جبکہ عوامی شکایات کے فوری حل کے لیے مرکزی کنٹرول روم بھی فعال ہے۔بعد ازاں، ڈی سی لاہور نے تحصیل شالیمار میں انسدادِ ڈینگی سرویلنس اور انسدادی تدابیر کی کارکردگی کا جائزہ لیا۔ ڈی ڈی ایچ او نے بریفنگ دیتے ہوئے بتایا کہ ڈینگی لاروا کی برآمدگی پر ملحقہ 10 مکانات میں فوری طور پر کیمیائی اسپرے کیا جاتا ہے۔

ڈی سی لاہور نے ہدایت کی کہ کباڑ خانوں، نرسریوں اور ڈینگی ہاٹ اسپاٹس کی باقاعدگی سے روزانہ چیکنگ کی جائے اور شہریوں میں ڈینگی سے بچاؤ کے لیے آگاہی فراہم کرتے ہوئے پانی کھڑا نہ ہونے دیا جائے۔علاوہ ازیں، ڈپٹی کمشنر لاہور نے مریم نواز اسکول فار اسپیشل چلڈرن کا دورہ کیا اور خصوصی صلاحیتوں کے حامل بچوں کے ساتھ انتہائی شفقت سے گفتگو کی۔

انہوں ن اسکول میں کمپیوٹر لیب، آن لائن ارننگ، جاب سیکنگ سیکشن، آٹزم بلاک، اسپیچ تھراپی، سائیکالوجی اور جسمانی سرگرمیوں کے شعبوں کا تفصیلی معائنہ کیا۔ ڈی سی لاہور نے کہا کہ خصوصی بچے ہمارا قیمتی سرمایہ ہیں اور کمپیوٹر لیب و آن لائن ارننگ کے ذریعے ان کو خودکفیل بنانے کے لیے تمام ممکنہ وسائل اور معیاری تعلیمی و طبی ماحول فراہم کیا جائے گا۔