کیمبرج امتحانی نظام پر سوالیہ نشان، ریاضی کا پرچہ بھی لیک،وفاقی وزیر کا نوٹس

اسلام آباد(ایجو کیشن رپورٹر)پاکستان میں کیمبرج امتحانات کے پرچے لیک ہونے کا سلسلہ تھم نہ سکا، جس کے نتیجے میں آج ہونے والا میتھ پیپر 2 بھی وقت سے پہلے سوشل میڈیا پر گردش کرنے لگا۔ اس صورتحال نے ملک بھر کے محنتی طلبہ اور والدین کو شدید ذہنی کرب میں مبتلا کر دیا ہے۔

وفاقی وزیر تعلیم کا سخت نوٹس

وفاقی وزیر تعلیم ڈاکٹر خالد مقبول صدیقی نے کیمبرج پرچوں کے مبینہ طور پر لیک ہونے کے واقعات کا سخت نوٹس لیتے ہوئے گہری تشویش اور افسوس کا اظہار کیا ہے۔ انہوں نے واضح کیا کہ کسی کو بھی محنتی طلبہ کے مستقبل سے کھیلنے کی اجازت نہیں دی جائے گی۔

خالد مقبول صدیقی کا کہنا تھا:

"گزشتہ سال بھی اس طرح کے واقعات سامنے آئے تھے، کیمبرج کو اپنا امتحانی نظام مزید فول پروف اور مضبوط بنانا ہوگا۔ ان کوتاہیوں کی وجہ سے طلبہ اور ان کے والدین شدید ذہنی دباؤ کا شکار ہیں۔”

فوری اقدامات کی ہدایت

وفاقی وزیر نے آئی بی سی سی کو ہدایت جاری کی ہے کہ وہ اس معاملے پر کیمبرج حکام کے ساتھ فوری اجلاس طلب کرے۔ انہوں نے زور دیا کہ:

• آئی بی سی سی طلبہ کے مفادات کے تحفظ کے لیے فی الفور اقدامات کرے۔
• شفاف امتحانی نظام اور میرٹ پر کوئی سمجھوتہ نہیں کیا جائے گا۔
• واقعے کی مکمل تحقیقات کی جائیں اور حقائق عوام کے سامنے لائے جائیں۔

وفاقی وزیر تعلیم نے اعادہ کیا کہ طلبہ کے اعتماد کی بحالی حکومت کی اولین ترجیح ہے اور اس سلسلے میں تمام ضروری وسائل بروئے کار لائے جائیں گے۔

---