کیمبرج انٹرنیشنل امتحانات،ریاضی کا پرچہ آؤٹ، سوشل میڈیا پر وائرل

کراچی(ایجو کیشن رپورٹر)دنیا کے سب سے بڑے اور معروف امتحانی نظام کیمبرج انٹرنیشنل کے تحت ہونے والے امتحانات میں ریاضی کا پرچہ اور جوابات لیک ہو گئے ہیں، جس سے ملک بھر میں تشویش پھیل گئی ہے۔

ذرائع کے مطابق بدھ کی دوپہر کو ہونے والا اے ایس لیول ریاضی 1 (کوڈ 9707/9709) کا پرچہ گزشتہ شب ہی سوشل میڈیا ایپ ریڈ اِٹ (Reddit) پر حل شدہ حالت میں وائرل ہو گیا تھا۔ یہ واقعہ مئی جون سیشن کے امتحانات کے دوران پاکستان اور ریجن میں پیش آیا ہے۔

رپورٹ کے مطابق حل شدہ پرچہ متعلقہ ایپ پر مبینہ طور پر فروخت ہونے کے بعد واٹس ایپ کے ذریعے طالب علموں میں تیزی سے پھیل گیا۔ ابتدا میں غیر حل شدہ اور بعد ازاں حل شدہ پرچہ سامنے آنے سے امتحانی شفافیت پر سنگین سوالات اٹھ رہے ہیں۔