طالبات کو لے جانے والی پنجاب یونیورسٹی بس کےڈرائیور اور کنڈکٹر پر حملہ سر پھاڑ دیا گیا

لاہور(سپیشل رپورٹر)
لاہور روڈ پر سیم نالہ پل کے قریب ایک انتہائی افسوسناک اور دل دہلا دینے والا واقعہ پیش آیا ہے جہاں ڈمپر ٹرک کے اوباش ڈرائیور نے اپنے ساتھیوں کے ساتھ مل کر پنجاب یونیورسٹی کی طالبات کی بس پر حملہ کر دیا۔

تفصیلات کے مطابق پنجاب یونیورسٹی کی بس طالبات کو لے کر لاہور روڈ سے گزر رہی تھی کہ اوباش ڈمپر ڈرائیور نے پہلے بس کو ہٹ (ٹکر) کیا اور پھر مسلسل پیچھا کرنا شروع کر دیا۔ ملزم نے سیم نالہ پل کے قریب پہنچ کر اپنے دیگر اوباش ساتھیوں کو بھی بلا لیا اور بس کو زبردستی روک لیا۔

وزیر تعلیم رانا سکندر حیات کی زیرِ صدارت ‘نواز شریف سکول آف ایمیننس’ فیز 2 کے لائسنسز کا اجلاس

ملزمان نے بس کے ڈرائیور پر بے دردی سے حملہ کرتے ہوئے شدید تشدد کا نشانہ بنایا، جس کے نتیجے میں بس ڈرائیور کا سر پھٹ گیا۔ اس دوران ملزمان نے بس میں سوار طالبات کے ساتھ بھی انتہائی بدتمیزی اور چھیڑ چھاڑ کی۔ واقعے کے دوران خوفزدہ طالبات کی چیخ و پکار سے علاقے میں شدید ہراس پھیل گیا اور موقع پر شہریوں کا ہجوم اکٹھا ہو گیا۔

ذرائع کے مطابق اطلاع دینے کے باوجود پولیس موقع پر تاخیر سے پہنچی۔ واقعے پر گہرے غم و غصے کا اظہار کرتے ہوئے اہل علاقہ اور متاثرہ طالبات کے ورثاء نے وزیراعلیٰ پنجاب، آئی جی پنجاب، آر پی او شیخوپورہ اور ڈی پی او شیخوپورہ سے فوری نوٹس لیتے ہوئے ملزمان کے خلاف سخت ترین قانونی کارروائی کا مطالبہ کیا ہے۔