پشاور(ایجو کیشن رپورٹر)گورنر خیبر پختونخوا فیصل کریم کنڈی نے کہا ہے کہ تعلیم کسی بھی معاشرے کی ترقی کی بنیاد ہے اور سکول صرف کتابی تعلیم دینے کے مراکز نہیں بلکہ قوم کے مستقبل کی تشکیل کے ادارے ہیں۔ ان خیالات کا اظہار انہوں نے گزشتہ روز گورنر ہاؤس پشاور میں منعقدہ "پشاور ماڈل گرلز سکول ٹوڈلہ زاک روڈ” کی چیمپئن ایوارڈ تقریب سے خطاب کرتے ہوئے کیا۔
تقریب میں پشاور ماڈل ایجوکیشنل انسٹیٹیوشن کے ڈائریکٹرز محمد غیور سیٹھی، محمد اسد سیٹھی، پرنسپل پشاور ماڈل گرلز ٹو عنبرین سلیم، ایڈمنسٹریٹر محمد یونس سیٹھی، طالبات اور ان کے والدین نے شرکت کی۔ اس موقع پر نمایاں کارکردگی کا مظاہرہ کرنے والی طالبات اور اساتذہ میں ایوارڈز بھی تقسیم کیے گئے۔ گورنر خیبر پختونخوا نے ادارے کی انتظامیہ، پرنسپل، اساتذہ، والدین اور بالخصوص ایوارڈز حاصل کرنے والی طالبات کو مبارکباد پیش کرتے ہوئے کہا
کہ ادارے کی تعلیمی میدان میں مسلسل اچھی کارکردگی خوش آئند ہے۔ فیصل کریم کنڈی نے اپنے خطاب میں مزید کہا:جدید تقاضے اور ٹیکنالوجی: دنیا مصنوعی ذہانت (AI) اور نئی ٹیکنالوجیز کی طرف تیزی سے بڑھ رہی ہے، اس لیے خیبر پختونخوا کے نوجوانوں کو عالمی مسابقت کے لیے جدید تعلیم اور جدید مواقع فراہم کرنا ہوں گے۔
مہارتوں کی اہمیت: نصابی تعلیم کے ساتھ طالبات کو سائنس، ٹیکنالوجی، تحقیق، تخلیقی صلاحیت، تنقیدی سوچ اور دیگر جدید مہارتوں سے آراستہ کرنا وقت کی اہم ضرورت ہے۔ لڑکیوں کی تعلیم: لڑکیوں کی تعلیم پورے معاشرے کے لیے سرمایہ کاری ہے، کیونکہ ایک تعلیم یافتہ عورت معاشرے کی بہتر تربیت اور ترقی میں بنیادی کردار ادا کرتی ہے۔
