لاہور (تعلیمی رپورٹر) پنجاب اسکول ایجوکیشن ڈیپارٹمنٹ نے کفایت شعاری مہم کے تحت اساتذہ کے کنوئنس الاؤنس میں کٹوتی کا باقاعدہ نوٹیفکیشن جاری کر دیا ہے
جس کے باعث صوبہ بھر میں ہزاروں اساتذہ مالی طور پر متاثر ہوں گے۔ تمام ضلعی ایجوکیشن اتھارٹیز کو ہدایات جاری کر دی گئی ہیں کہ اساتذہ کو صرف اُن دنوں کا کنوئنس الاؤنس دیا جائے گا جب وہ اسکول میں حاضر ہوں گے۔ یعنی جس دن حاضری نہیں ہوگی، اس دن کا الاؤنس بھی نہیں دیا جائے گا۔
چھٹیوں پر الاؤنس کی ادائیگی اور اساتذہ میں تشویش:
ذرائع کے مطابق، اس فیصلے کا اطلاق صوبہ بھر کے 3 لاکھ سے زائد اساتذہ پر ہوگا، جس سے حکومت کو اخراجات میں خاطر خواہ کمی کی توقع ہے۔
مزیدبرآں، جمعے کے روز دی جانے والی چھٹی کے باعث بھی اس دن کا کنوئنس الاؤنس ادا نہیں کیا جائے گا۔ حکام کا کہنا ہے کہ یہ اقدام اخراجات میں کمی کے لیے اٹھایا گیا ہے،
جبکہ گزشتہ تین ہفتوں کا کنوئنس الاؤنس بھی روک دیا گیا ہے، جس پر اساتذہ میں تشویش پائی جا رہی ہے۔ اساتذہ کی تنظیموں نے اس فیصلے کی مذمت کی ہے اور اسے تعلیم کے لیے ایک بڑا جھٹکا قرار دیا ہے۔