موسمِ گرما کی تعطیلات کا حتمی فیصلہ 15 مئی کے بعد ہوگا، وزیر تعلیم رانا سکندر حیات کی وضاحت
لاہور (ایجوکیشن رپورٹر) صوبائی وزیر تعلیم رانا سکندر حیات نے پنجاب کے تعلیمی اداروں میں جمعہ کی چھٹی کے حوالے سے گردش کرنے والی تمام افواہوں کو مسترد کرتے ہوئے واضح کیا ہے کہ یہ چھٹی مستقل بنیادوں پر نہیں دی گئی۔ انہوں نے اعلان کیا کہ اسکولوں میں جمعہ کی تعطیل جلد ختم کر دی جائے گی اور تمام ادارے اپنے باقاعدہ شیڈول پر واپس آ جائیں گے۔
بوزیر تعلیم نے اپنے بیان میں کہا کہ جمعہ کی چھٹی کے حوالے سے سوشل میڈیا پر کی جانے والی قیاس آرائیاں درست نہیں ہیں۔ آنے والے ہفتوں میں اس چھٹی کو مکمل طور پر ختم کر کے پرانا تدریسی شیڈول بحال کر دیا جائے گا تاکہ طلبہ کا تعلیمی حرج نہ ہو۔
اسکولوں میں گرمیوں کی چھٹیوں کے حوالے سے پوچھے گئے سوال پر رانا سکندر حیات نے بتایا کہ چھٹیوں کے دورانیے میں کمی یا ان کے شیڈول میں تبدیلی کے بارے میں فی الحال کوئی حتمی فیصلہ نہیں ہوا۔ انہوں نے واضح کیا کہ اس حوالے سے 15 مئی کے بعد مشاورت کی جائے گی اور تمام تجاویز وزیراعلیٰ پنجاب مریم نواز شریف کو پیش کی جائیں گی۔ وزیراعلیٰ کی حتمی منظوری کے بعد ہی موسمِ گرما کی تعطیلات کا باقاعدہ اعلان کیا جائے گا۔
وزیر تعلیم نے والدین اور طلبہ پر زور دیا کہ وہ غیر تصدیق شدہ خبروں پر کان نہ دھریں اور محکمہ تعلیم کے سرکاری اعلانات پر ہی بھروسہ کریں۔