ایم ڈی کیٹ ٹیسٹ 20 ستمبر کو ہو گا, تمام مراکز میں لائیو مانیٹرنگ کے لیے سیف سٹیز اتھارٹی کی خدمات حاصل، مرکزی کنٹرول روم قائم

لاہور (ایجو کیشن رپورٹر)پنجاب کے 15 اضلاع میں میڈیکل اینڈ ڈینٹل کالجز ایڈمیشن ٹیسٹ 20 ستمبر بروز اتوار کو منعقد کیا جائے گا۔ امتحانات میں شفافیت برقرار رکھنے اور کسی بھی قسم کی بدعنوانیاں و بوٹی مافیا کی روک تھام کے لیے حکومت نے امتحانی سنٹرز میں نصب کیمروں کو مرکزی مانیٹرنگ یونٹ سے منسلک کرنے کا فیصلہ کیا ہے۔

اس سلسلے میں محکمہ سپیشلائزڈ ہیلتھ کیئر اینڈ میڈیکل ایجوکیشن نے منیجنگ ڈائریکٹر پنجاب سیف سٹیز اتھارٹی کو باقاعدہ مراسلہ جاری کر دیا ہے۔ مراسلے کے مطابق صوبے کے 15 اضلاع بشمول لاہور، گجرات، ملتان اور ساہیوال میں قائم تمام امتحانی مراکز کی پنجاب سیف سٹیز اتھارٹی کے سیکیورٹی کیمروں اور لائیو فیڈ کے ذریعے کڑی نگرانی کی جائے گی۔

حکام کا کہنا ہے کہ مرکزی مانیٹرنگ یونٹ کے ذریعے ہر سنٹر کے حالات پر براہِ راست نظر رکھی جائے گی تاکہ پرچہ جات کی سیکورٹی، شفافیت اور پرامن ماحول کو یقینی بنایا جا سکے۔ طالب علموں اور ان کے والدین کی سہولت کے لیے سیکیورٹی اور ٹریفک کے بھی خصوصی انتظامات کیے جا رہے ہیں۔