نئے سکول لیڈر 3 سالہ کنٹریکٹ پر بھرتی کیے گئے؛ بعض لیڈرز کی مدتِ ملازمت میں توسیع کا بھی فیصلہ

پشاور (نیوز رپورٹر)

صوبائی حکومت نے خیبرپختونخوا کے مختلف سکولوں کے لیے 64 سکول لیڈرز کو تین سال کے لیے گریڈ 16 میں بھرتی کر لیا ہے، جبکہ مزید سکول لیڈرز کو بھرتی کرنے اور بعض موجودہ سکول لیڈرز کی مدتِ ملازمت میں مزید توسیع کرنے کا بھی فیصلہ کیا ہے۔

صوبائی کابینہ کی منظوری کے بعد ایجوکیشن ڈیپارٹمنٹ کی جانب سے اس سلسلے میں باقاعدہ اعلامیہ جاری کر دیا گیا ہے۔ جاری کردہ اعلامیے کے مطابق جن 64 سکول لیڈرز کو تین سالہ کنٹریکٹ کی بنیاد پر مقرر کیا گیا ہے، ان میں شفیع اللہ خان، عبدالرحمٰن ثاقب، وسیم اللہ خان، صاحبزادہ اویس خان، طارق عزیز خان، امیر اللہ جان، فہد نیاز خان، عرفان اللہ خان، جنید خان، مہران علی شاہ، اصغر خان، عطاء اللہ، شاہ عالمگیر، خیال محمد، شاہد خان، الطاف حسین، فیصل عبداللہ تنولی، اسد علی، محمد عثمان فہد، سمیع اللہ خان، خضر جدون، محمد صابر، محمد الیاس، امجد اللہ خان اور عابد اللہ وغیرہ شامل ہیں۔ ان تمام منتخب سکول لیڈرز کو صوبے کے مختلف علاقوں میں تعینات کر دیا گیا ہے۔

اعلامیے کے مطابق، دوسرے مرحلے میں خواتین سکول لیڈرز کو بھی بھرتی کرنے کا فیصلہ کیا گیا ہے۔ حکومت کی جانب سے یہ تمام اقدامات سرکاری سکولوں کی کارکردگی اور تعلیمی معیار کو مزید بہتر بنانے کے لیے اٹھائے گئے ہیں۔