سرکاری سکولوں میں خالی اسامیوں پر تعیناتیوں کا فیصلہ

پشاور (ایجو کیشن رپورٹر) محکمہ ابتدائی و ثانوی تعلیم خیبر پختونخوا نے صوبے کے تمام مڈل، ہائی اور ہائر سیکنڈری اسکولوں میں سربراہان اور اساتذہ کی خالی اسامیوں کو پر کرنے کے لیے ضلعی افسرانِ تعلیم کو تجاویز مرتب کر کے جمع کرانے کی ہدایت کر دی ہے

محکمہ ابتدائی و ثانوی تعلیم کی جانب سے تمام ضلعی افسرانِ تعلیم (مرد و خواتین) اور متعلقہ انتظامی حکام کو جاری مراسلے میں کہا گیا ہے کہ پی ایم آئی ایس کے ذریعے اساتذہ کی خالی اسامیوں سے متعلق تازہ رپورٹس فراہم کر دی گئی ہیں، جس کی بنیاد پر متعلقہ سکول سربراہان کا اجلاس بلا کر خالی اسامیوں پر تعیناتی کے لیے ٹھوس تجاویز تیار کی جائیں
مراسلے کے مطابق

افغان میڈیکل طلباء کو کلاسز لینے سے روکنے کا حکم معطل، یونیورسٹی کو تعلیم میں رکاوٹ بننے سے روک دیا

جہاں موزوں خالی اسامی دستیاب ہو، وہاں کسی بھی استاد کو ایس ڈی نہیں رکھا جائے گا

ہیڈ ٹیچر یا ہیڈ ماسٹر کی اسامی خالی ہونے کی صورت میں ایس ایس ٹی جنرل یا اس سے زیادہ گریڈ کے کسی استاد کو عارضی طور پر سربراہ مقرر کرنے کی تجویز دی جا سکے گی

مڈل اسکولوں میں ایس ایس ٹی یا ہیڈ ماسٹر دستیاب نہ ہونے کی صورت میں ایس سی ٹی یا ایس ڈی ایم کو سربراہ مقرر کرنے کی تجویز پیش کی جا سکے گی

ہائی اور ہائر سیکنڈری اسکولوں میں سائنس اساتذہ کی کمی کی صورت میں سائنس کے مضامین میں اعلیٰ تعلیمی قابلیت رکھنے والے پی ایس ٹی اساتذہ کو عارضی طور پر تعینات کرنے کی تجویز بھی دی جا سکے گی

اسی طرح ہائر سیکنڈری اسکول میں پرنسپل کی اسامی خالی ہونے اور قریبی اسکول میں وائس پرنسپل دستیاب ہونے کی صورت میں ضرورت کے مطابق وائس پرنسپل کو پرنسپل تعینات کرنے کی تجویز دی جائے گی

محکمے نے واضح کیا ہے کہ تمام تجاویز اسکول کی حقیقی ضروریات، منظور شدہ اسامیوں، طلبہ کے داخلے اور مضمون وار اساتذہ کی ضرورت کو مدنظر رکھتے ہوئے تیار اور مکمل تصدیق کے بعد جمع کرائی جائیں