اسلام آباد (خصوصی رپورٹر) فیڈریشن آف آل پاکستان یونیورسٹیز اکیڈمک اسٹاف ایسوسی ایشنز (فپواسا) پاکستان نے مالی سال 2026-27 کے وفاقی بجٹ کو مکمل طور پر مسترد کرتے ہوئے اسے ملک کے اعلیٰ تعلیمی شعبے اور سرکاری جامعات کے لیے انتہائی مایوس کن اور نقصان دہ قرار دے دیا ہے۔
فپواسا پاکستان کے مرکزی عہدیداروں نے ایک مشترکہ بیان میں اس امر پر شدید تشویش کا اظہار کیا ہے کہ ملک بھر کی سرکاری جامعات پہلے ہی تاریخ کے شدید ترین مالی بحران سے گزر رہی ہیں، مگر اس کے باوجود وفاقی حکومت نے نئے بجٹ میں جامعات کے لیے کوئی مناسب ریکرنگ گرانٹ مختص نہیں کی، جس سے تعلیمی بحران مزید سنگین ہونے کا خدشہ ہے۔
اعلامیے میں بتایا گیا ہے کہ مالی معاونت نہ ہونے کے باعث ملک کی متعدد جامعات اپنے روزمرہ کے بنیادی اخراجات پورے کرنے سے بالکل قاصر ہو چکی ہیں، جبکہ کئی اعلیٰ تعلیمی اداروں کو اپنے اساتذہ اور ملازمین کی ماہانہ تنخواہوں اور ریٹائرڈ ملازمین کی پنشن کی ادائیگیوں میں بھی شدید ترین مشکلات کا سامنا ہے۔
فپواسا کا اصولی مؤقف، فپواسا کے نمائندوں کا کہنا ہے کہ جامعات کسی بھی قوم کی ترقی، خوشحالی اور روشن مستقبل کی بنیاد ہوتی ہیں۔ انہوں نے وفاقی حکومت کو متوجہ کرتے ہوئے واضح کیا کہ سائنس و ٹیکنالوجی، تحقیق، جدت اور معاشی استحکام کے میدان میں ملک کو آگے لے جانے کا خواب اس وقت تک شرمندۂ تعبیر نہیں ہو سکتا، جب تک حکومت اعلیٰ تعلیم اور تحقیقی شعبوں میں خاطر خواہ سرمایہ کاری کو اپنی اولین ترجیح نہیں بناتی۔ فاپواسا نے حکومت سے مطالبہ کیا ہے کہ بجٹ میں ہائیر ایجوکیشن کے فنڈز پر نظرثانی کی جائے تاکہ جامعات کو ممکنہ بندش سے بچایا جا سکے۔