پڑھائی کے لیے برطانیہ جانے والے 10 ہزار پاکستانی طلبہ نے وہاں جا کر پناہ (اسائلم) مانگ لی

پڑھائی کے لیے برطانیہ جانے والے 10 ہزار پاکستانیوں نے پناہ مانگ لی: ڈی جی ایف آئی اے

اسلام آباد (نیوز ڈیسک) قومی اسمبلی کی قائمہ کمیٹی برائے داخلہ کا اجلاس چیئرمین راجہ خرم نواز کی زیر صدارت منعقد ہوا، جس میں ڈائریکٹر جنرل (ڈی جی) ایف آئی اے محسن حسن بٹ نے بیرون ملک پاکستانیوں کی ڈی پورٹیشن اور غیر قانونی سفر کے حوالے سے اہم بریفنگ دی۔

ڈی جی ایف آئی اے نے انکشاف کیا کہ برطانیہ میں 10 ہزار پاکستانیوں نے اسٹوڈنٹ ویزے کا غلط استعمال کیا اور وہاں جا کر پناہ (اسائلم) کی درخواستیں دائر کر دیں۔ اس کے علاوہ ملائیشیا اور ازبکستان کے ذریعے ہیومن اسمگلنگ کا ایک نیا روٹ بھی سامنے آیا ہے۔

رپورٹ کے اہم ترین حقائق اور اعداد و شمار

• ویزے کا غلط استعمال: 10 ہزار پاکستانی اسٹوڈنٹ ویزے پر برطانیہ گئے اور وہاں پناہ مانگ لی۔
• واپس نہ آنے والے مسافر: رواں سال آذربائیجان کے وزٹ ویزے پر جانے والے 7 ہزار پاکستانی اور بیلاروس جانے والے 580 پاکستانی واپس نہیں لوٹے۔
• آف لوڈنگ کی تفصیلات: ڈی جی ایف آئی اے کے مطابق سال 2025 میں بغیر دستاویزات بیرون ملک جانے والے 39 ہزار 786 افراد کو آف لوڈ کیا گیا۔ جبکہ اسٹاپ لسٹ اور انٹرپول کی وجہ سے 3 ہزار سے زائد افراد آف لوڈ ہوئے۔
• لیبیا سے گرفتاریاں: لیبیا سے 175 پاکستانیوں کو گرفتار کر کے واپس لایا گیا ہے۔
• جرائم میں کمی: ایف آئی اے کی سخت کارروائیوں کے باعث منظم بھکاریوں میں 75 فیصد اور جعلی دستاویزات کی تیاری میں 31 فیصد نمایاں کمی ریکارڈ کی گئی ہے۔

کمیٹی کو بریفنگ دیتے ہوئے حکام کا کہنا تھا کہ غیر قانونی طور پر بیرون ملک جانے والے افراد پاکستان کی بدنامی کا باعث بن رہے ہیں، جس پر قابو پانے کے لیے سخت اقدامات کیے جا رہے ہیں۔