یونیورسٹی آف ایجوکیشن میں ربیع الاول کی مناسبت سے قومی خطاطی نمائش "درِ عشقِ محمد ﷺ” کا انعقاد

لاہور (ایجو کیشن رپورٹر) یونیورسٹی آف ایجوکیشن کے ٹاؤن شپ کیمپس میں ماہِ مبارک ربیع الاول کی آمد کی مناسبت سے "درِ عشقِ محمد ﷺ” کے عنوان کے تحت ایک شاندار قومی خطاطی نمائش کا اہتمام کیا گیا، جس میں ملک بھر کے ماہرین کے خوبصورت اور منفرد فن پارے نمائش کے لیے پیش کیے گئے۔
اس روح پرور تقریب کا اہتمام شعبہ آرٹ اینڈ ڈیزائن نے ڈائریکٹوریٹ آف اسٹوڈنٹ افیئرز کے تعاون سے کیا۔ نمائش میں روایتی اور جدید دونوں اسالیبِ خطاطی کا بہترین امتزاج دیکھنے کو ملا، جہاں قرآنی آیات، اسوۂ حسنہ اور مقدس کلمات کو نہایت مہارت اور خوبصورتی کے ساتھ کینوس پر اتارا گیا۔

نمائش میں اساتذہ، طلبہ، فنونِ لطیفہ سے وابستہ شخصیات اور شہریوں کی بڑی تعداد نے شرکت کی اور فن پاروں کو بے حد سراہا۔ شرکاء نے ماہر خطاطوں کی کاوشوں کو خراجِ تحسین پیش کرتے ہوئے کہا کہ اس نوعیت کی نمائشیں ماہِ ربیع الاول کی مناسبت سے ہمارے روحانی، ثقافتی اور تہذیبی ورثے کو نئی جلا بخشتی ہیں۔