ثانوی تعلیمی بورڈ کراچی، دسویں جماعت سائنس گروپ کے سالانہ امتحانات برائے 2026 کے نتائج کا اعلان

کراچی(ایجو کیشن رپورٹر) ثانوی تعلیمی بورڈ کراچی نے دسویں جماعت سائنس گروپ کے سالانہ امتحانات برائے 2026 کے نتائج کا اعلان کر دیا ہے، جس کے مطابق امتحانات میں کامیابی کا مجموعی تناسب 80.87 فیصد رہا۔

تفصیلات کے مطابق میٹرک بورڈ کراچی کی جانب سے جاری کردہ اعداد و شمار کے تحت رواں سال سائنس گروپ کے امتحانات میں مجموعی طور پر 1 لاکھ 75 ہزار 200 امیدواروں نے شرکت کی۔ جن میں سے 1 لاکھ 41 ہزار 868 امیدواروں نے کامیابی حاصل کی، جبکہ 29 ہزار 655 امیدوار امتحانات پاس کرنے میں ناکام رہے۔

اے ون گریڈ حاصل کرنے والے طلبہ کی تعداد میں ریکارڈ اضافہ

میٹرک بورڈ کے نتائج میں رواں سال سب سے نمایاں پہلو ‘اے ون’ گریڈ حاصل کرنے والے طلبہ کی تعداد میں غیر معمولی اضافہ ہے۔ گزشتہ سال کے مقابلے میں اس سال 5 ہزار سے زائد طلبہ نے اے ون گریڈ حاصل کیا ہے۔

جاری کردہ اعداد و شمار کے مطابق امتحانات میں شریک 1 لاکھ 75 ہزار 200 امیدواروں میں سے ریکارڈ 35 ہزار 529 طلبہ نے اے ون گریڈ حاصل کر کے نمایاں کامیابی اپنے نام کی۔

گزشتہ تین سالوں کے نتائج کا تقابلی جائزہ

گزشتہ سالوں کے اعداد و شمار پر نظر ڈالی جائے تو میٹرک بورڈ کی کارکردگی اور نتائج میں مسلسل تبدیلی دیکھنے کو ملی ہے:

بورڈ ریکارڈ کے مطابق سال 2024 میں سابق چیئرمین شرف علی شاہ کے دور میں 23 ہزار 943 طلبہ اے ون گریڈ لا سکے تھے۔ جس کے بعد سال 2025 میں سابق چیئرمین غلام حسین سوہو کے دور میں بڑی تبدیلی آئی اور 7 ہزار کے اضافے کے ساتھ یہ تعداد 30 ہزار 154 تک پہنچ گئی۔ اب رواں سال (2026) میں مزید 5 ہزار طلبہ کے اضافے کے ساتھ تاریخ کی بلند ترین سطح یعنی 35 ہزار 529 پر پہنچ چکی ہے۔