خیبرپختونخوا کے سرکاری سکولوں میں فرنیچر کا بحران،26 ہزار سکولوں میں 15 لاکھ نشستوں کی کمی

پشاور (خصوصی رپورٹر) خیبرپختونخوا کے سرکاری سکولوں میں فرنیچر کی فراہمی میں سنگین انتظامی عدم مساوات کا انکشاف ہوا ہے۔ محکمہ تعلیم کے جاری کردہ خصوصی سروے کے مطابق صوبے بھر کے ہزاروں سکولوں میں طلبہ کے لیے 14 لاکھ 94 ہزار 287 نشستوں کی شدید قلت ہے، جبکہ دوسری جانب بظاہر عدم توجہی کے باعث متعدد سکولوں میں ضرورت سے زائد 11 لاکھ 6 ہزار 800 نشستیں موجود ہیں۔

صوبائی سطح پر فرنیچر کی صورتحال:

• طلبہ بمقابلہ نشستیں: صوبے کے سرکاری سکولوں میں مجموعی طور پر 55 لاکھ 39 ہزار 495 طلبہ زیر تعلیم ہیں، جبکہ قابلِ استعمال نشستوں کی مجموعی گنجائش 51 لاکھ 52 ہزار 8 ہے۔ اگر پورے صوبے کو ایک اکائی تصور کیا جائے تو مجموعی طور پر 3 لاکھ 87 ہزار 487 نشستوں کی کمی بنتی ہے۔

• متاثرہ بمقابلہ اضافی سہولت والے سکول: صوبے کے 18 ہزار 426 سکولوں میں نشستیں بچوں کی تعداد سے بہت کم ہیں، جبکہ ہزاروں سکول ایسے ہیں جہاں طلبہ کی ضرورت سے کہیں زیادہ فرنیچر بیکار پڑا ہوا ہے۔

• نئے فرنیچر کی تقسیم کا تناسب: حکومت کی طرف سے فراہم کردہ 2 لاکھ 72 ہزار 713 نئے فرنیچر یونٹس میں سے 99.5 فیصد مکمل قابلِ استعمال ہیں۔ تاہم، یہ جدید فرنیچر صرف 6 ہزار 857 سکولوں (20.8 فیصد) تک محدود رہا ہے، جبکہ 26 ہزار 40 سکول اب بھی بنیادی فرنیچر کے منتظر ہیں۔

مسئلے کا فوری اور ممکنہ حل:

رپورٹ کے مطابق سکولوں میں پرانے فرنیچر کے 53 لاکھ 85 ہزار 612 یونٹس موجود ہیں، جن میں سے 9.2 فیصد فرنیچر مرمت کے قابل اور 2.6 فیصد نااہل/ناقابلِ استعمال قرار دیا گیا ہے۔

محکمہ تعلیم کے مطابق اگر درج ذیل دو اہم اقدامات اٹھائے جائیں تو یہ بحران تقریباً ختم ہو سکتا ہے:

1. اضافی فرنیچر کی ری ریلوکیشن: زیادہ فرنیچر والے سکولوں سے 11 لاکھ سے زائد اضافی نشستیں فرنیچر کی کمی کا شکار سکولوں میں منتقل کی جائیں۔

2. مرمت و بحالی: مرمت طلب فرنیچر کی مرمت کروا کر 3 لاکھ 72 ہزار 642 نشستیں دوبارہ قابلِ استعمال بنائی جائیں۔

اگر مرمت اور فرنیچر کی منتقلی کا یہ عمل مکمل کر لیا جائے تو صوبے میں نشستوں کی خالص کمی 14 لاکھ سے گھٹ کر صرف 14 ہزار 845 رہ جائے گی، جسے آسانی سے پورا کیا جا سکتا ہے۔