خیبر پختونخوا حکومت کا اساتذہ تبادلوں کے لیے ای-ٹرانسفر پورٹل اب ہر مہینے کھولنے کا فیصلہ

سیکرٹری تعلیم خیبر پختونخوا کا بڑا فیصلہ, تبادلوں کے لیے ای-ٹرانسفر پورٹل اب ہر مہینے کھلے گی، پنشن کیسز بھی فوری حل کرنے کا حکم

پشاور (بیورو رپورٹ) سیکرٹری تعلیم خیبر پختونخوا، محمد خالد نے اساتذہ اور تعلیمی ملازمین کے لیے اہم ریلیف کا اعلان کرتے ہوئے تبادلوں (ٹرانسفرز) کے لیے ای-ٹرانسفر پورٹل کو اب ہر ماہ کھولنے کا فیصلہ کیا ہے۔ اس سے قبل اساتذہ کو تبادلے کی درخواست دینے کے لیے طویل انتظار کرنا پڑتا تھا، لیکن اب یہ سہولت باقاعدگی سے ہر مہینے میسر ہوگی، جس سے ہزاروں ملازمین کو سہولت ملے گی۔ یہ فیصلہ انہوں نے پشاور میں منعقدہ کھلی کچہری کے دوران عوام اور اساتذہ کے براہِ راست مسائل سننے کے بعد کیا۔

کھلی کچہری میں سیکرٹری تعلیم نے رٹائرڈ ملازمین کے مسائل کو سنجیدگی سے سنتے ہوئے پنشن کیسز کو فوری طور پر نمٹانے اور ان کی پنشن کی ادائیگی میں تاخیر کو ختم کرنے کے احکامات جاری کیے۔ انہوں نے واضح کیا کہ ملازمین کی پنشن کے کیسز کو جلد از جلد حل کیا جائے

تاکہ رٹائرمنٹ کے اگلے ہی مہینے سے ان کی ماہانہ پنشن کی ادائیگی شروع ہو سکے۔ اس کے علاوہ، سیکرٹری تعلیم نے محکمہ کے تمام ڈائریکٹرز کو ہدایات دیں کہ اگر کسی ملازم کے خلاف انکوائری چل رہی ہو تو اس دوران اس کی تنخواہ بند نہ کی جائے، تاکہ ان کا گھر چل سکے اور انکوائری کا عمل بھی جاری رہے۔ انہوں نے عوامی مسائل کے فوری حل اور محکمہ تعلیم میں شفافیت کے لیے اپنی عزم کا اظہار کیا۔