لاہور (ایجوکیشن رپورٹر ) بورڈ آف انٹرمیڈیٹ اینڈ سیکنڈری ایجوکیشن لاہور کے زیرِ اہتمام جاری میٹرک کے دوسرے سالانہ امتحان 2026 کے سلسلے میں انگریزی کے پرچے کے دوران کنٹرولر امتحانات کے سرپرائز وزٹ اور سخت مانیٹرنگ کے نتیجے میں 9 امیدواروں کو نقل کرتے ہوئے موقع پر پکڑ لیا گیا۔
تفصیلات کے مطابق، کنٹرولر امتحانات توصیف الرحمن نے مختلف امتحانی مراکز کے اچانک دورے کیے۔ اس دوران گورنمنٹ مسلم ماڈل ہائی سکول اردو بازار لاہور سے ایک امیدوار محمد عبداللہ کو نقل کے غیر قانونی ذرائع استعمال کرتے ہوئے موقع پر پکڑا گیا۔
گورنمنٹ لیب ہائر سیکنڈری سکول قصور سے 3 امیدواروں (عمیر علی مرزا، محمد طلحہ اور محمد عاطف) کو نقل کرتے ہوئے گرفتار کیا گیا۔
گورنمنٹ علی عباس شہید ہائر سیکنڈری سکول مریدکے (شیخوپورہ) سے 5 امیدواروں (محمد عمیر، وسیم علی، سید اظہار الحق بخاری، محمد سمیر اور عبدالرحمن) کو موقع پر نقل کرتے ہوئے پکڑا گیا۔
اس موقع پر گفتگو کرتے ہوئے کنٹرولر امتحانات توصیف الرحمن نے واضح کیا کہ امتحانی نظام میں بوٹی مافیا اور نقل کی کسی قسم کی کوئی گنجائش نہیں ہے۔
