محکمہ تعلیم سکولز پنجاب نے ہارڈ شپ پر اساتذہ کے تبادلوں کی تاریخ کا اعلان کر دیا

اساتذہ کے تبادلوں کا انتظار ختم، صوبائی وزیر تعلیم کا 18 مارچ کو آرڈرز جاری کرنے کا اعلان

لاہور (سپیشل رپورٹر) صوبائی وزیر تعلیم نے اساتذہ کے تبادلوں کے حوالے سے پائے جانے والے طویل انتظار کو ختم کرتے ہوئے اعلان کیا ہے کہ تبادلوں کے آرڈرز 18 مارچ کو جاری کر دیے جائیں گے۔ محکمہ اسکول ایجوکیشن کی جانب سے تبادلوں کے لیے تین ماہ قبل درخواستیں طلب کی گئی تھیں، تاہم آرڈرز میں تاخیر کی وجہ سے اساتذہ برادری میں شدید تشویش پائی جا رہی تھی۔

محکمانہ اعداد و شمار کے مطابق تبادلوں کے لیے 56 ہزار سے زائد اساتذہ نے درخواستیں جمع کروائی تھیں، جن کی جانچ پڑتال کے بعد میرٹ کی بنیاد پر تقریباً 8 ہزار اساتذہ کا انتخاب کیا گیا ہے۔ حکام کا کہنا ہے کہ تبادلوں کے حتمی فیصلے کے لیے 20 روز قبل کمیٹیاں بھی تشکیل دی گئی تھیں

تاکہ تمام مراحل کو شفاف بنایا جا سکے۔ دوسری جانب اساتذہ کا مؤقف تھا کہ وہ گزشتہ تین ماہ سے شدید مشکلات کا شکار ہیں، جس پر وزیر تعلیم نے یقین دہانی کرائی ہے کہ تمام معاملات کو حتمی شکل دے دی گئی ہے اور 18 مارچ کو ‘ہارڈ شپ’ تبادلوں کے آرڈرز جاری کر کے اساتذہ کو فوری ریلیف فراہم کیا جائے گا۔