میرپور خاص تعلیمی بورڈ , میٹرک و انٹر کے نتائج میں ہیرا پھیری پر کنٹرولر امتحانات انور علیم خانزادہ برطرف

میرپور خاص تعلیمی بورڈ میں بڑا اسکینڈل: میٹرک و انٹر کے نتائج میں ہیرا پھیری پر کنٹرولر امتحانات انور علیم خانزادہ برطرف

کراچی (سٹاف رپورٹر)سندھ حکومت نے میرپور خاص تعلیمی بورڈ میں میٹرک اور انٹر کے سالانہ امتحانات 2026 کے نتائج میں مبینہ بڑے پیمانے پر ہیرا پھیری اور جعلی سرٹیفکیٹس کے اجرا کے سنگین اسکینڈل پر ایک بڑا ایکشن لیتے ہوئے کنٹرولر امتحانات، انور علیم خانزادہ کو فوری طور پر ملازمت سے برطرف کر دیا ہے۔ یہ فیصلہ فروری 2026 میں محکمہ تعلیم کی جانب سے تشکیل دی گئی خصوصی انکوائری کمیٹی کی تحقیقاتی رپورٹ کی روشنی میں کیا گیا ہے، جس میں موصوف پر لگے الزامات درست ثابت پائے گئے تھے۔

صوبائی وزیر تعلیم محمد اسماعیل راہو نے واقعے کی تصدیق کرتے ہوئے بتایا کہ انور علیم کے خلاف انکوائری رپورٹ میں میٹرک اور انٹر کے نتائج میں بڑے پیمانے پر ‘ٹیمپرنگ’ اور نمبروں کے ردوبدل کے الزامات ثابت ہوئے تھے۔ تحقیقاتی رپورٹ کے مطابق، کنٹرولر امتحانات نے من پسند طلبہ کو نوازنے کے لیے نتائج میں غیر قانونی تبدیلیاں کیں،

جس سے میرٹ کی پامالی ہوئی اور تعلیمی نظام کی ساکھ کو شدید نقصان پہنچا۔ انہوں نے واضح کیا کہ سندھ حکومت کسی بھی قسم کی بدعنوانی کو برداشت نہیں کرے گی اور اس اسکینڈل میں ملوث دیگر افراد کے خلاف بھی سخت قانونی کارروائی کی جائے گی تاکہ مستقبل میں ایسے واقعات کا تدارک ہو سکے۔