وزیراعلیٰ پنجاب ای بائیکس سکیم، طلبہ کے لیے سکوٹی ڈرائیونگ سکولز اور خصوصی کاؤنٹرز قائم، خواتین کو مفت تربیت کی فراہمی جاری

(ایجو کیشن رپورٹر)لاہور

وزیراعلیٰ پنجاب کی ای بائیکس سکیم کے تحت طلبہ و طالبات کی سہولت کے لیے ڈرائیونگ ٹریننگ سکولز اور خصوصی لائسنس کاؤنٹرز قائم کر دیے گئے ہیں۔ چیف ٹریفک آفیسر (سی ٹی او) لاہور سید عبدالرحیم شیرازی کی ہدایت پر ای بائیک سکیم سے مستفید ہونے والے طلبہ کے لیے 5،5 ڈرائیونگ ٹریننگ سکولز اور تمام لائسنس سینٹرز میں سکوٹی لائسنس کے لیے الگ کاؤنٹرز قائم کیے گئے ہیں۔

سی ٹی او لاہور کے مطابق سکوٹی لائسنس کے حصول کے لیے طلبہ و طالبات کو صرف اپنا قومی شناختی کارڈ ساتھ لانا ہوگا۔

ٹریننگ سینٹرز اور "ویمن ٹو ویمن” سروس

لاہور میں سکوٹی ٹریننگ کے لیے درج ذیل 5 مراکز قائم کیے گئے ہیں:

• آبشار ڈرائیونگ سکول

• لبرٹی خدمت مرکز

• گریٹر اقبال پارک

• ٹریفک پولیس لائنز مناواں

• ایل او ایس فیروزپور روڈ

ایل او ایس فیروزپور روڈ کے مرکز پر صرف خواتین کو مفت سکوٹی چلانے کی تربیت فراہم کی جا رہی ہے۔ خواتین کے تمام سکولز میں "ویمن ٹو ویمن” (خواتین اساتذہ کی جانب سے تربیت) سروس مہیا کی گئی ہے۔

خواتین ڈرائیورز کے اعداد و شمار

سی ٹی او سید عبدالرحیم شیرازی نے بتایا کہ:

• اب تک 8,220 خواتین کار ڈرائیونگ جبکہ 7,290 خواتین سکوٹی چلانے کی مفت تربیت حاصل کر چکی ہیں۔

• روان سال 1,629 خواتین نے ٹریفک پولیس کے ڈرائیونگ سکولز سے تربیت مکمل کی ہے۔

• اس وقت شہر بھر میں خواتین کے لیے سکوٹی ٹریننگ کے 5 اور کار ڈرائیونگ کے 12 سکولز فعال ہیں۔

سی ٹی او لاہور کا کہنا تھا کہ خواتین کو ڈرائیونگ سکھا کر خودمختار اور بااختیار بنایا جا رہا ہے، کیونکہ معاشرتی اور سماجی ترقی کے لیے مردوں کے ساتھ خواتین کا کردار بھی نہایت اہمیت کا حامل ہے۔