وزیر اعلیٰ پنجاب لیپ ٹاپ سکیم میں بڑی توسیع کی سفارش، دو نئے ماڈلز زیرِ غور
لاہور (سپیشل رپورٹر) پنجاب حکومت نے بڑھتی ہوئی طلب کے پیشِ نظر سی ایم لیپ ٹاپ پروگرام کو مزید وسعت دینے کے لیے دو اہم ماڈلز پر مشتمل سفارشات تیار کر لی ہیں۔ پہلے ماڈل کے تحت پروگرام میں 50 فیصد اضافے کی تجویز ہے جس سے 1 لاکھ 65 ہزار طلبہ مستفید ہو سکیں گے اور اس پر تقریباً 40 ارب روپے لاگت آئے گی۔ دوسری تجویز میں پروگرام کو 100 فیصد بڑھانے کی سفارش کی گئی ہے، جس کی لاگت 54 ارب روپے ہوگی اور اس کے ذریعے 2 لاکھ 20 ہزار طلبہ کو لیپ ٹاپ دیے جا سکیں گے۔
ذرائع کے مطابق، منصوبے کی موجودہ لاگت 27 ارب روپے ہے جبکہ اب تک 35 ہزار طلبہ میں لیپ ٹاپ تقسیم کیے جا چکے ہیں۔ پروگرام کی بڑھتی ہوئی مقبولیت کا اندازہ اس بات سے لگایا جا سکتا ہے کہ اب تک 1 لاکھ 43 ہزار سے زائد طلبہ اپلائی کر چکے ہیں۔ محکمہ ہائر ایجوکیشن (HED) نے امیدواروں کی سہولت کے لیے درخواستیں جمع کرانے کی تاریخ میں 20 مارچ تک توسیع کر دی ہے۔ واضح رہے کہ اس سکیم میں سرکاری جامعات کے ساتھ ساتھ پرائیویٹ، فیڈرل چارٹرڈ اور علامہ اقبال اوپن یونیورسٹی کے طلبہ بھی درخواست دینے کے اہل ہیں۔
