پنجاب میں ایس ٹی آئیز کی ملازمت جاری رکھنے اور ماہانہ 15 ہزار روپے اضافے کی منظوری

لاہور ( ایجو کیشن رپورٹر) حکومت پنجاب نے سکول ٹیچرز انٹرنز (STIs) کے فیز ون اور فیز ٹو کے تحت پہلے سے تعینات اساتذہ کو اپنی خدمات جاری رکھنے کی باقاعدہ منظوری دے دی ہے۔ محکمہ سکول ایجوکیشن کی جانب سے پنجاب کی تمام ضلعی ایجوکیشن اتھارٹیز (DEAs) کو ایس ٹی آئیز کے ساتھ نئے معاہدے (Contracts) فوری طور پر جاری کرنے کی ہدایات دے دی گئی ہیں۔

نئی پالیسی کے اہم نکات درج ذیل ہیں:

• انٹرن شپ کی نئی مدت: ایس ٹی آئیز کی نئی انٹرن شپ کی مدت 16 ستمبر سے شروع ہو کر 31 مئی 2027ء تک برقرار رہے گی۔

• ماہانہ پے انکریمنٹ: ایس ٹی آئیز کے لیے ماہانہ 15 ہزار روپے اضافی معاوضے کی منظوری دے دی گئی ہے، جس کا اطلاق نظرثانی شدہ شرائط و ضوابط (Revised T&Cs) پر پورا اترنے کی صورت میں ہوگا۔

• معاہدوں کی تجدید: 31 مئی 2026ء کو جن ایس ٹی آئیز کی مدت مکمل ہو گئی تھی اور جن کے کنٹریکٹ ختم نہیں کیے گئے، انہیں انٹرن شپ جاری رکھنے کی اجازت ہوگی اور ان کے ساتھ نئے معاہدے سائن کیے جائیں گے۔

• عدم اہلیت کی شرط: وہ ایس ٹی آئیز جنہوں نے 31 مئی 2026ء سے قبل استعفیٰ دے دیا تھا یا اپنا عہدہ چھوڑ دیا تھا، وہ اس توسیع کے اہل نہیں ہوں گے۔

محکمہ ایجوکیشن کے اس اقدام سے پنجاب بھر کے سرکاری سکولوں میں تدریسی سرگرمیوں کا تسلسل برقرار رہے گا اور انٹرن اساتذہ کی مالی معاونت بھی ممکن ہو سکے گی۔