پنجاب یونیورسٹی ہراسگی اسکینڈل, طالبات کے الزامات، انتظامیہ کی تردید اور قانونی چارہ جوئی کا اعلان

(ایجو کیشن رپورٹر)

پنجاب یونیورسٹی لاہور کے شعبہ سپورٹس میں طالبات کو مبینہ طور پر ہراساں کرنے اور بلیک میلنگ کا اسکینڈل سامنے آیا ہے، جو کئی ہفتے پرانا بتایا جا رہا ہے۔ قومی سطح پر کھیلنے والی اور 29 میڈلز حاصل کرنے والی طالبہ سونیا فاروق نے یونیورسٹی انتظامیہ پر 25 لاکھ روپے دبانے اور ہراساں کرنے کے الزامات عائد کیے ہیں۔ روزنامہ خبریں سے خصوصی گفتگو کرتے ہوئے سمیرا بشیر نے بتایا کہ

معاملہ ایڈمن آفیسر الیاس بھٹی کی جانب سے ویڈیوز بنانے اور ہراساں کرنے سے شروع ہوا، جس پر کوئی کارروائی نہیں کی گئی بلکہ انہیں زبردستی ہاسٹل سے نکال دیا گیا۔ طالبات نے شعبہ سپورٹس کے ایڈمن آفیسر الیاس مبین بھٹی پر تعلقات استوار کرنے پر اکسانے، انکار پر جان سے مارنے کی دھمکیاں دینے اور یونیورسٹی کے اندر دفنانے کی بات کرنے کے سنگین الزامات عائد کیے ہیں۔ سونیا فاروق کا کہنا ہے کہ انہیں واجب الادا رقم کی ادائیگی پر افسران باہر کھانا کھانے اور ہوٹل میں قیام کرنے کا کہتے ہیں۔ ثمرا بشیر نے بھی حیرت انگیز انکشافات کرتے ہوئے کہا کہ ہاسٹل میں سوتے ہوئے ویڈیوز بنائی جاتی ہیں اور بلیک میل کیا جاتا ہے۔

ہراسگی کاشکارسونیا فاروق اورثمرا بشیر سوشل میڈیا پر بیان جاری کرتے ہوئے

یونیورسٹی انتظامیہ کے ترجمان نے کہا کہ طالبات کے الزامات بے بنیاد، من گھڑت اور حقائق کے منافی ہیں، ان کے پیچھے ایک مافیا ہے جو ہر سال داخلوں کے وقت سامنے آتا

ہے۔ سابق طالبات کے خلاف گرلز سپورٹس ہاسٹل میں نظم و ضبط کی متعدد خلاف ورزیوں پر قانون کے مطابق کارروائی کی گئی ہے۔ شعبہ سپورٹس نے کارِ سرکار میں مداخلت، سرکاری املاک کو نقصان پہنچانے اور بلیک میلنگ پر سابق طالبات کے خلاف پولیس کو درخواست دے دی ہے

جبکہ سوشل میڈیا پراپیگینڈا کے خلاف سائبر کرائم میں بھی درخواست جمع کرائی گئی ہے۔اس حوالے سے یونیورستی سپورٹس ڈیپارٹمنٹ کے ڈائریکٹر شبیر سرور، ایڈیشنل ڈائریکٹر طاہرہ اور ایدمن آفیسر الیاس بھٹی کی جانب سے ویڈیو بیان بھی جاری کیا گیا ہے جس میں ڈائریکٹر شبیر سرور نے اس معاملے کو طالبات کی لڑائی قرار دیا ہے                                                                                                                        

ڈائریکٹر سپورٹس شبیر سرور،ایڈیشنل ڈائریکٹر سپورٹس طاہرہ اور ایڈمن آفیسر الیاس بھٹی سوشل میڈیا پر ہراسگی کے حوالے سے ویڈیو بیان دیتے ہوئے