کراچی (ایجو کیشن رپورٹر) صوبہ سندھ میں وائس چانسلرز کے تقرر کے لیے قائم سرچ کمیٹی نے پیپلز یونیورسٹی آف میڈیکل اینڈ ہیلتھ سائنسز برائے خواتین کے وائس چانسلر کے عہدے کے لیے میرٹ پر تین امیدواروں کے ناموں کا انتخاب مکمل کر لیا ہے،
چیئرمین سندھ ہائر ایجوکیشن کمیشن ڈاکٹر طارق رفیع کی سربراہی میں منعقدہ اجلاس میں 16 امیدواروں کو شارٹ لسٹ کیا گیا تھا جس میں ایک سابق وزیراعلیٰ سندھ کی صاحبزادی بھی شامل تھیں، ذرائع کے مطابق 14 امیدواروں نے انٹرویو میں شرکت کی جبکہ ایک امیدوار غیر حاضر رہا اور ایک نے آن لائن انٹرویو دیا،سرچ کمیٹی نے اپنی سفارشات میں ڈاکٹر اکبر سیال کو پہلے، ڈاکٹر صالحہ خاصخیلی کو دوسرے اور ڈاکٹر عثمان چاچڑ کو تیسرے نمبر پر رکھا ہے،
یہ تینوں نام محکمہ داخلہ کے توسط سے انٹیلیجنس کلیئرنس کے لیے بھیجے جائیں گے جہاں سے رپورٹ موصول ہونے کے بعد وزیراعلیٰ سندھ کسی ایک نام کی بطور وائس چانسلر حتمی منظوری دیں گے، واضح رہے کہ یونیورسٹی کی موجودہ وائس چانسلر ڈاکٹر گلشن میمن کی پہلی مدت ملازمت گزشتہ برس مکمل ہو گئی تھی تاہم ان کی مدت میں توسیع نہیں کی گئی تھی اور انہیں تاحکم ثانی عہدے پر برقرار رکھا گیا تھا۔