کسی قسم کی غیر قانونی بھرتی نہیں کی جائے گی، ‘نو ورک نو سیلری’ پالیسی پر سختی سے عملدرآمد ہوگا، تمام سرکاری گاڑیاں ٹرانسپورٹ پول میں جمع کر دی گئی ہیں: وائس چانسلر پروفیسر نعمت اللہ بابر کی پریس کانفرنس
ڈیرہ اسماعیل خان (نامہ نگار) گومل یونیورسٹی ڈیرہ میں وائس چانسلر پروفیسر ڈاکٹر نعمت اللہ بابر نے رجسٹرار عمران اللہ خان اور کنٹرولر امتحانات محمد طلحہ کے ہمراہ ایک پریس کانفرنس سے خطاب کیا۔
پریس کانفرنس سے خطاب کرتے ہوئے انہوں نے کہا کہ ملازمین کو بروقت تنخواہوں کی ادائیگی ان کا بنیادی حق ہے، تاہم یونیورسٹی میں “نو ورک، نو سیلری” پالیسی پر سختی سے عملدرآمد کیا جائے گا۔ انہوں نے واضح کیا کہ صرف وہی ملازمین تنخواہ کے حقدار ہوں گے جو اپنی ذمہ داریاں باقاعدگی سے سرانجام دیں گے۔
کفایت شعاری اور اصلاحاتی اقدامات
وائس چانسلر (وی سی) نے بتایا کہ صوبائی حکومت کی کفایت شعاری پالیسی کے تحت گومل یونیورسٹی کی تمام سرکاری گاڑیاں ٹرانسپورٹ پول میں جمع کر دی گئی ہیں۔ اس کے علاوہ انہوں نے پریس کانفرنس میں یہ بھی عزم دہرایا کہ یونیورسٹی میں کسی بھی قسم کی غیر قانونی بھرتی نہیں کی جائے گی تاکہ ادارے پر اضافی مالی بوجھ نہ پڑے۔
صوبائی حکومت کا شکریہ
پروفیسر ڈاکٹر نعمت اللہ بابر نے صوبائی وزیر برائے اعلیٰ تعلیم خیبر پختونخوا مینا خان آفریدی کا خصوصی شکریہ ادا کرتے ہوئے کہا کہ انہوں نے گومل یونیورسٹی کے لیے ڈھائی ارب روپے کی گرانٹ کی منظوری میں بھرپور تعاون کیا ہے، جس سے یونیورسٹی کو مالی استحکام حاصل کرنے میں مدد ملے گی۔