اوقاتِ کار کی خلاف ورزی پر ضابطۂ اخلاق کے تحت تادیبی کارروائی کا انتباہ؛ نئے دفتری اوقات کا نوٹیفکیشن بھی جاری

کراچی (ایجوکیشن رپورٹر)

جامعہ کراچی کی انتظامیہ نے تدریسی اور غیر تدریسی ملازمین کی دفاتر میں بروقت حاضری اور موجودگی یقینی بنانے کے لیے سخت ہدایات جاری کر دی ہیں۔ انتظامیہ نے خبردار کیا ہے کہ مقررہ سرکاری اوقاتِ کار کی خلاف ورزی کرنے والے ملازمین کے خلاف سخت تادیبی کارروائی عمل میں لائی جائے گی۔

یہ اقدام جامعہ کے قائم مقام وائس چانسلر پروفیسر ڈاکٹر محمد طفیل جوکھیو کی جانب سے وقت کی پابندی اور انتظامی نظم و ضبط پر خصوصی زور دیے جانے کے بعد اٹھایا گیا ہے۔

رجسٹرار آفس سے نوٹیفکیشن جاری

جامعہ کراچی کے رجسٹرار پروفیسر ڈاکٹر عمران احمد صدیقی کی جانب سے جاری کردہ نوٹیفکیشن کے مطابق تمام ڈینز، ڈائریکٹرز، چیئرپرسنز اور شعبہ جاتی سربراہان (HODs) کو ہدایت کی گئی ہے کہ وہ اپنے تحت کام کرنے والے تدریسی و غیر تدریسی عملے کی دفتری اوقات میں موجودگی کو ہر صورت یقینی بنائیں۔

دفتری اوقات اور وقفہ برائے نماز و طعام

نوٹیفکیشن کے مطابق دفتری اوقات درج ذیل ہوں گے

• دفتری ایام: پیر تا جمعہ (صبح 8:30 بجے سے شام 4:30 بجے تک)
• پیر تا جمعرات وقفہ: دوپہر 1:00 بجے سے 2:00 بجے تک (نماز و دوپہر کا کھانا)
• جمعہ کا وقفہ: دوپہر 1:00 بجے سے 2:30 بجے تک

قانونی کارروائی کا انتباہ

انتظامیہ نے واضح کیا ہے کہ اوقاتِ کار کی پابندی نہ کرنے والے ملازمین کے خلاف یونیورسٹی آف کراچی ایمپلائز (ایفیشنسی اینڈ ڈسپلن) آرڈیننس 1962 اور جامعہ کراچی ایکٹ 1972 کے تحت قانونی و تادیبی اقدام کیا جائے گا۔ وائس چانسلر کی منظوری سے جاری ہونے والے یہ احکامات فوری طور پر نافذ العمل کر دیے گئے ہیں۔