ٹنڈوجام زرعی یونیورسٹی میں طلبہ کے 2 گروہوں میں تصادم، فائرنگ و لاٹھی چارج سے 6 افراد زخمی، تدریسی سرگرمیاں معطل

ٹنڈوجام (نامہ نگار) زرعی یونیورسٹی ٹنڈوجام کی کراپ پروڈکشن فیکلٹی میں کلاس روم کے اندر کرسی پر بیٹھنے کے معمولی تنازع پر طلبہ کے دو گروہوں کے درمیان شدید تصادم ہو گیا۔ تصادم کے دوران مبینہ فائرنگ، لاٹھیوں اور ڈنڈوں کے آزادانہ استعمال کے نتیجے میں 6 افراد شدید زخمی ہو گئے۔

ذرائع کے مطابق کرسی پر بیٹھنے کی تکرار دیکھتے ہی دیکھتے سنگین جھگڑے میں تبدیل ہو گئی اور بعد ازاں یہ معاملہ مکرانی اور کلہری برادریوں کے درمیان تصادم کی شکل اختیار کر گیا۔ واقعے کے بعد زخمیوں کو طبی امداد کے لیے مقامی رورل ہیلتھ سنٹر منتقل کیا گیا، تاہم دونوں گروہوں کے افراد وہاں بھی پہنچ گئے جہاں دوبارہ جھگڑا شروع ہو گیا اور ہسپتال کا علاقہ بھی میدانِ جنگ بن گیا۔

زخمیوں میں روشن علی کلہری، گل زمان کلہری، زاہد مکرانی، علی مکرانی بلوچ اور الیاس مکرانی بلوچ سمیت دیگر شامل ہیں جنہیں طبی امداد فراہم کی جا رہی ہے۔ واقعے کی اطلاع ملتے ہی پولیس کی بھاری نفری نے موقع پر پہنچ کر فریقین کو منتشر کیا اور صورتحال پر قابو پایا۔

تصادم اور کشیدہ صورتحال کے باعث سندھ زرعی یونیورسٹی انتظامیہ نے منگل اور بدھ کے درمیانی جھگڑے کے بعد آج 2 ستمبر کو تمام تدریسی سرگرمیاں معطل  رکھیں، جبکہ پولیس نے مزید تصادم روکنے کے لیے علاقے میں حفاظتی اقدامات شروع کر دیے ہیں۔