صوبے کی 5 سرکاری میڈیکل یونیورسٹیوں میں وائس چانسلرز کی تعیناتی کے لیے درخواستیں طلب

صوبے کی 5 سرکاری میڈیکل یونیورسٹیوں میں وائس چانسلرز کی تعیناتی کے لیے درخواستیں طلب

تعیناتی 4 سال کے لیے ہوگی جو کہ ناقابلِ توسیع ہے؛ وائس چانسلرز کسی سرکاری، نجی، اعزازی یا انتظامی عہدے پر فائز نہیں رہ سکیں گے، نجی پریکٹس کی بھی اجازت نہیں ہوگی

لاہور(سپیشل رپورٹر)

اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ نے صوبے کی پانچ سرکاری میڈیکل یونیورسٹیوں میں وائس چانسلرز (VCs) کی مستقل تعیناتی کے لیے باقاعدہ درخواستیں طلب کر لی ہیں۔

جاری کردہ اعلامیے کے مطابق، جن 5 جامعات کے لیے درخواستیں طلب کی گئی ہیں ان میں درج ذیل طبی تعلیمی ادارے شامل ہیں:

1. کنگ ایڈورڈ میڈیکل یونیورسٹی، لاہور
2. فاطمہ جناح میڈیکل یونیورسٹی، لاہور
3. یونیورسٹی آف ہیلتھ سائنسز لاہور
4. فیصل آباد میڈیکل یونیورسٹی، فیصل آباد
5. راولپنڈی میڈیکل یونیورسٹی، راولپنڈی

اہلیت کا معیار اور مطلوبہ شرائط

اعلامیے کے مطابق، امیدوار کے لیے درج ذیل معیار پر پورا اترنا لازمی قرار دیا گیا ہے

• تعلیمی قابلیت: امیدوار کے لیے ایم بی بی ایس (کم از کم سیکنڈ ڈویژن) یا اس کے مساوی لیول کی تعلیمی اور میڈیکل اہلیت ہونا ضروری ہے۔ اس کے ساتھ ایف سی پی ایس، ایم ڈی، ایم ایس یا بنیادی طبی علوم میں پی ایچ ڈی ہونا لازمی ہے۔
• تجربہ: امیدوار پاکستان میڈیکل اینڈ ڈینٹل کونسل (PMDC) سے تسلیم شدہ ادارے میں کم از کم 10 سال بطور پروفیسر خدمات انجام دے چکا ہو۔
• تحقیقی مقالے: ہائر ایجوکیشن کمیشن (HEC) یا پی ایم ڈی سی سے تسلیم شدہ اور انڈیکسڈ میڈیکل جرائد میں کم از کم 20 تحقیقی مقالے (Research Papers) شائع ہو چکے ہوں۔
• عمر کی حد: درخواست جمع کرانے کی آخری تاریخ تک امیدوار کی عمر 70 سال سے کم ہونی چاہیے۔

تعیناتی کی شرائط اور طریقہ کار

وائس چانسلرز کی یہ تعیناتی چار سال کے لیے ہوگی جو کہ قانوناً ناقابلِ توسیع ہوگی۔ تعیناتی کے دوران وائس چانسلر کسی بھی دوسری سرکاری، نجی، اعزازی یا انتظامی عہدے پر فائز نہیں رہ سکیں گے، جبکہ انہیں کسی بھی قسم کی نجی پریکٹس کرنے کی بھی اجازت نہیں ہوگی۔

درخواست جمع کرانے کی آخری تاریخ

خواہش مند اور اہل امیدوار مقررہ درخواست فارم پر تمام مطلوبہ دستاویزات، این او سی اور این ڈی سی کے ہمراہ اپنی درخواستیں 20 جولائی تک اسپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ کے فیسیلیٹیشن سینٹر، لاہور میں جمع کرا سکتے ہیں۔ تمام درخواستوں کی جانچ پڑتال کے بعد صرف شارٹ لسٹ کیے گئے امیدواروں کو ہی انٹرویو کے لیے طلب کیا جائے گا۔