پرچے میں صفر نمبر، نویں کا طالب علم عدالت پہنچ گیا

پرچے میں صفر نمبر، نویں کا طالب علم عدالت پہنچ گیا

کنٹرولر امتحانات کو طالب علم عبدالمعیز کا بیالوجی پرچہ عدالت میں پیش کرنے کی ہدایت

پشاور (جنرل رپورٹر)

پشاور ہائیکورٹ نے نویں جماعت کے طالب علم عبدالمعیز خان کو بیالوجی کے پرچے میں صفر نمبر دینے کے خلاف دائر رٹ پٹیشن پر کنٹرولر امتحانات کو طالب علم کا پرچہ عدالت میں پیش کرنے کی ہدایت کر دی ہے۔ رٹ کی سماعت جسٹس اعجاز انور اور جسٹس بابر ستار پر مشتمل دو رکنی بنچ نے کی.

درخواست گزار کے وکیل امین الرحمن یوسفزئی نے عدالت کو بتایا کہ درخواست گزار نے نویں جماعت کے پرچوں میں A1 گریڈ حاصل کیا اور تقریباً تمام پرچوں میں اس کے 90 فیصد نمبر بنتے ہیں۔ تاہم بیالوجی کے تھیوری میں اسے 0 نمبر دیے گئے، جبکہ اسی پرچے کے ایم سی کیوز اور پریکٹیکل میں اس نے 25 میں سے 23 مارکس لیے ہیں۔

انہوں نے بتایا کہ طالب علم نے ری چیکنگ کے لیے اپلائی کیا اور بورڈ سے پرچہ دکھانے کا بھی مطالبہ کیا۔ فاضل جسٹس نے قرار دیا کہ کنٹرولر آف امتحانات پشاور بورڈ پرچہ عدالت میں پیش کریں اور سماعت ملتوی کر دی۔